Па-беларуску можна не размаўляць, але мову ведаць трэба. Так лічыць Яўген Мірзікян, акцёр тэатра і кіно, сола-гітарыст гурта “Мясцовыя”, які зараз жыве ў горадзе Бяроза. Яўген адказаў на нашыя “Тры пытанні”:

БЕЛАРУСЫ
За беларусаў ніколі і нідзе не сорамна. Часам блытаюць з рускімі, але калі разумеюць, што ты беларус, ставяцца з павагай і вельмі прыязна. Беларус заўжды добры, вясёлы і гасцінны чалавек. Не злапомны. Гэта, напэўна, звязана з гісторыяй, бо мы як нацыя заўжды знаходзіліся пасярэдзіне, між некім.

БЕЛАРУСЬ
Яна насамрэч зялёная і чыстая. Гэта праўда. І гэта вельмі адрознівае Беларусь ад Расійскай Федэрацыі. Варта толькі перасекчы мяжу, адразу разумееш, дома ты ці не.

МОВА
Калі існаваў наш гурт “Мясцовыя”, ён адрозніваўся менавіта тэкстамі на беларускай мове. На ўсіх фестывалях, дзе мы былі, гэта адзначалі, казалі, малайцы. Хаця некаторыя ўспрымалі іначай: калі спяваюць па-беларуску – значыць, апазіцыянеры. І ў нашым горадзе хапае людзей, якія размаўляць па-беларуску. Гэта не пазёрства і не дэманстрацыя нечага. Да іх часам таксама ставяцца падазрона: а чаму ты так размаўляеш? А навошта?.. Сам я спакойна рэагую, хоць амаль і не размаўляю па-беларуску, хіба калі запрашаюць правесці канцэрт.
Ты можаш не размаўляць па-беларуску, але ведаць мову павінны.

“Тры пытанні” – інтэрв’ю-праект, прысвечаны сучаснай беларускай ідэнтычнасці.